पंढरपूर : ‘शहराच्या विकासासाठी कॅनडा सरकारने आर्थिक साह्य करण्याची घोषणा केली आहे. कॅनडा सरकारने दोन हजार कोटी रुपयांचा विकास आराखडा तयार केला आहे,’ अशी माहिती मंदिर समितीचे अध्यक्ष अतुल भोसले यांनी दिली.
भारत आणि कॅनडा सरकारच्या मैत्रीला दीडशे वर्षे पूर्ण झाल्याच्या निमित्ताने परदेशी शहराच्या धर्तीवर पंढरपूरचा विकास करण्याला तत्त्वतः मंजुरी देण्यात आली.
कॅनडा सरकारचे प्रतिनिधी आणि मंदिर समिती अध्यक्ष अतुल भोसले तसेच राज्य सरकार प्रशासन अधिकाऱ्यांची बैठक पार पडली. बैठकीनंतर पंढरपूर शहराचा विकास करण्याची घोषणा करण्यात आली. तीन ऑक्टोबरला ‘कौन्सिल जनरल ऑफ कॅनडा’ पंढरपुरात येणार आहेत.
या योजनेसाठी कॅनडा सरकार आणि मंदिर समिती, तसेच नगर परिषद यांच्यात करार होणार आहे. पंढरपूर शहराचा चेहरामोहरा बदलण्यासाठी जवळपास दोन हजार कोटी रुपयांची गुंतवणूक कॅनडा सरकार करणार आहे. कॅनडा ट्रेड कॉर्पोरेशनच्या वतीने हे काम हाती घेतले जाणार आहे.
